ۋەتەنسىزگە ھەممە يەر تۈن، تاڭ ئاتمايدىكەن- ئابدۇرەھىم پاراچ

ئابدۇرەھىم پاراچ

ۋەتەنسىزگە ئايەممۇ ھېچ
ياراشمايدىكەن،
شاھ تونىنى كەيسىمۇ ئەل
قاراشمايدىكەن .

ياكى ھېچكىم كۆڭلىنى بىر
ئاياشمايدىكەن .
ئۇنۇڭ ئۈچۈن لىۋەنلەر چاچ
تاراشمايدىكەن .

ۋەتەنسىزنى بۇ دۇنيامۇ
ئويلاشمايدىكەن .
ئۇنىڭ توغرا ئىشلىرىمۇ
قولاشمايدىكەن .

ۋەتەنلىككە جۇدۇندا گۈل
سولاشمايدىكەن .
قارىغۇسى يول ماڭسىمۇ
ئاداشمايدىكەن .

ۋەتەنسىزدەك «ۋەتەن!» دەپ
قېيداشمايدىكەن .
دەرت كۆرسىمۇ ئالەمچە ھەم
ياداشمايدىكەن .

ۋەتەنسىزگە ئىسىلزادە،
تويلاشمايدىكەن .
چاقچاققىمۇ رايى يوقكەن
ئويناشمايدىكەن .

ۋەتەنلىككە ئىتمۇ قوپال
قاۋاشمايدىكەن .
ۋەتىنى بار ئىتمۇ ھەتتا
تالاشمايدىكەن .

ۋەتەنسىزنىڭ تويىنىمۇ كىم
قۇتلاشمايدىكەن .
ئۇ كۈن قۇشمۇ ئېچىلىپ مۇڭ
سايراشمايدىكەن .

ۋەتەنلىكنىڭ يولى ئوچۇق
تاقاشمايدىكەن .
ۋەتەنسىزگە ھەممە يەر تار
تاڭ ئاتمايدىكەن .