خوتەندە جازالانغان بىر كەنت سېكرىتارىنىڭ جىنايىتى: دىنىي زاتلارنىڭ ئالدىدا تاماكا چېكىشكە جۈرئەت قىلالمىغان

يېقىندا خوتەندە جازالانغانلىقى ئېلان قىلىنغان 97 كادىردىن، بىر كەنت سېكرىتارى «دىنىي زاتلارنىڭ ئالدىدا تاماكا چېكىشكە جۈرئەت قىلالمىغانلىقى» ئۈچۈن جازالانغان.

6- ئاپرېل، «خوتەن گېزىتى» ئۈندىدار سۇپىسىدا خىتاينىڭ شەرقىي تۈركىستانغا قويغان پارتكوم سېكرىتارى چېن چۈەنگونىڭ ئورۇنلاشتۇرۇشى بىلەن، 3- ئاينىڭ 12- كۈنى «ئامما خىزمىتىنى نازارەت قىلىش» نامىدىكى بىر گۇرۇپپىنىڭ خوتەنگە ئەۋەتىلگەنلىكى ۋە ھازىرغا قەدەر 97 نەپەر كادىرنىڭ جازالانغانلىقى خەۋەر قىلىنغان ئىدى.

خىتاينىڭ «كۆزەتكۈچى» تورى 9- ئاپرېل بۇ ھەقتە تەپسىلىي بىر خەۋەر بەرگەن بولۇپ، ماۋزۇسى «خوتەندە 97 نەپەر كادىرنىڭ مەسئۇلىيىتى سۈرۈشتە قىلىندى: كەنت ياچېيكا سېكرىتارى دىنىي زاتلارنىڭ ئالدىدا تاماكا چېكىشكە جۈرئەت قىلالمىغان» دەپ قويۇلغان.

خەۋەردە ئېيتىلىشىچە، تۇنجى تۈركۈمدە ئېلان قىلىنغان كىشىلەر 97 نەپەر بولۇپ، ئىككى نەپىرى ۋىلايەتكە بىۋاستە قاراشلىق ئورگانلاردىن، 31 نەپىرى ناھىيە ۋە شەھەر دەرىجىلىك ئورۇنلاردىن، 37 نەپىرى يېزا – بازار كادىرى، 20 نەپىرى كەنت كادىرى ۋە يەتتە نەپىرى كەنت ساقچىسى ئىكەن.

ئۇلاردىن ئالتە كىشىگە دىلو تۇرغۇزۇلغان، 18 كىشىنىڭ ئەمىلى تۆۋەنلىتىلگەن، 31 كىشىگە پارتىيە ئىچىدە ئاگاھلاندۇرۇش، 12 كىشىگە مەمۇرىي ئاگاھلاندۇرۇش بېرىلگەن.

خەۋەردە جازالانغانلارنىڭ تىزىملىكى تەپسىلىي بېرىلگەن بولۇپ، مۇتلەق كۆپ قسىمى ئۇيغۇر.

بۇلاردىن، خوتەن ناھىيە بۇزاق يېزا ئازىناباغ كەنتىنىڭ پارتىيە ياچېيكا سېكرىتارى جىلىل مەمەتنىيازنىڭ «سىياسىي مەيدانى مۇستەھكەم، بايرىقى روشەن ئەمەسلىكى ۋە دىنىي زاتلارنىڭ ئالدىدا تاماكا چېكىشكە جۈرئەت قىلالمىغانلىقى تەكشۈرۈپ ئېنىقلانغان.» 3- ئاينىڭ 25- كۈنى، خوتەن ناھىيەلىك پارتكوم جىلىل مەتنىيازغا پارتىيە ئىچىدە ئاگاھلاندۇرۇش جازاسى بېرىپ، سېكرىتارلىق ۋەزىپىسىدىن ئېلىپ تاشلىغان

http://turkistantimes.com/uy/news-1446.html