ئۇيغۇر زىيالىيسى ئىلھام توختى تۇنجى قېتىم ئايالى ۋە پەرزەنتلىرى بىلەن كۆرۈشتۈرۈلگەن

ئۇيغۇر زىيالىيسى ئىلھام توختى مۇددەتسىز قاماق جازاسىغا ھۆكۈم قىلىنىپ تۇنجى قېتىم ئايالى ۋە پەرزەنتلىرى بىلەن كۆرۈشتۈرۈلگەن.

ئىلھام توختىنىڭ خانىمى گۈزەلنۇرنىڭ رادىئومىزغا بىلدۈرۈشىچە، كۆرۈشۈش ئىككى ھەپتە ئېگىرى، يەنى 7 – ئىيۇل ئۈرۈمچى بىرىنچى تۈرمىسىدە بولغان.

كۆرۈشكە ئىلھام توختىنىڭ ئايالى، ئىككى بالىسى ۋە بىر ئاكىسى بولۇپ جەمئىي 4 ئادەم قاتناشقان. كۆرۈشۈش بىر سائەت ئەتراپىدا داۋام قىلغان بولۇپ، پۈتۈن جەرياننى تۆت ئەتراپنى قورشاپ تۇرغان ساقچىلار كۆزىتىپ تۇرغان.

كۆرۈشتە ئۇلارنىڭ پەقەت ئۆز ئەھۋالى ۋە ئائىلە ئىشلىرى ھەققىدىلا سۆزلىشىشىگە يول قويۇلغان، دېلو توغرىسىدا سۆزلىشىشىگە رۇخسەت قىلىنمىغان.

گۈزەلنۇر خانىمنىڭ ئېيتىشىچە، ئىلھام توختى بۇرۇنقىدىن ياداپ قالغان بولسىمۇ، ئەمما روھىي خېلى كۆتۈرەڭگۈ ئىكەن.

ئۇيغۇر زىيالىيسى ئىلھام توختى 2014 – يىلى 20 – يانىۋار بېيجىڭدىكى تۇرالغۇسىدىن تۇتۇپ كېتىلگەن.بىر ئايدىن كېيىن ئۇنىڭ«دۆلەتنى پارچىلاش جىنايىتى» بىلەن قولغا ئېلىنغانلىقى ئۇقتۇرۇلغان.

شۇ يىلى 23 سېنتەبىر ئۈرۈمچى ئوتتۇرا سوت مەھكىمىسى ئىلھام توختى ئۈستىدىن سوت ئاچقان ۋە ئۇنى «دۆلەتنى پارچىلاش جىنايىتى» بىلەن مۇددەتسىز قاماق جازاسىغا ھۆكۈم قىلغان ئىدى

http://www.rfa.org/uyghur/qisqa_xewer/ilham-toxti-07222015224218.html